Árásarhrina tölvuþrjóta hafin á ný

08. október 2014

Póstur frá erlendum tölvuþrjótum

Samtök fjármálafyrirtækja vilja vekja athygli á því að ný árásarhrina erlendra tölvuþrjóta á viðskiptavini fjármálafyrirtækja er hafin. Um er að ræða tölvupóstsendingar og í póstinum er tengill inn á sýndarvefsíðu sem sögð er vera  netbanki viðkomandi fjármálafyrirtækis og viðtakendur hvattir til að innskrá sig.

Samtök fjármálafyrirtækja ítreka að aðildarfélög SFF senda aldrei út póst þar sem farið er fram á að viðtakandi gefi upp auðkenni sín og vilja brýna fyrir viðskiptavinum sínum að gæta vel að sér ef þeir fá óskir um slíkt.   Þá er einnig mikilvægt að viðskiptavinir skrái sig eingöngu inn í netbanka í gegnum vefforsíður viðkomandi fjármálafyrirtækja.

Þessi árás sem nú stendur yfir nær til margra Evrópuríkja og eru íslensk fjármálafyrirtæki í samskiptum við fjármálafyrirtæki í öðrum löndum vegna hennar.  Það sem er frábrugðið við þann tölvupóst sem nú er sendur til íslenskra viðskiptavina er að íslenskan sem er notuð í honum er skárri en áður auk þess virðist árásin beinast frekar gegn fyrirtækjum en einstaklingum. Sennilegast er að þrjótarnir sækist frekar eftir að komast inn í netbanka lögaðila sem hafa heimildir til að milliafæra á erlenda reikninga.

Á vef Samtaka fjármálafyrirtækja er að finna upplýsingar um öryggismál fyrir viðskiptavini sem og gátlista fyrir tölvuöryggi sem gott er að kynna sér. Gátlistann má finna hér.