Nýji Kaupþing verður Arion banki

20. nóvember 2009

Frá og með morgundeginum, 21. nóvember 2009, mun Nýi Kaupþing banki skipta um nafn og heita Arion banki. Nýju nafni fylgir ný stefna og gildi. Með nýjum áherslum er verið svara kröfum viðskiptavina og starfsmanna um breytingar í kjölfar endurskipulagningar bankans sem gerð var vegna hins mikla umróts sem hefur orðið í íslensku og alþjóðlegu efnahagsumhverfi. Nýtt nafn mun auk þess koma í veg fyrir misskilning bæði í almennri umræðu og meðal innlendra og erlendra samstarfsaðila bankans.

Leiðarljós bankans eru fagmennska, framsækni, umhyggja og tryggð þar sem viðskiptavinurinn er í forgrunni. Nýja nafnið er sótt í grískar fornsögur og vísar m.a. til þrautseigju, samvinnu og endurkomu. Efnt var til samkeppni um nýtt nafn meðal starfsmanna bankans og var nafnið valið úr á þriðja hundrað tillagna.

Finnur Sveinbjörnsson, bankastjóri Arion banka, segir breytingarnar tímabærar: ,,Nýtt nafn, stefna og gildi marka nýtt upphaf hjá bankanum, við erum á vissan hátt að segja skilið við hið gamla og ætlum að takast á við þær áskoranir sem eru í samfélaginu af fullum krafti. Markmiðið er að byggja upp traustan, öflugan banka sem vinnur með og fyrir fólkið í landinu.”

Bankanum ber að sýna aðhald og ráðdeild eins og önnur fyrirtæki og heimili í landinu. Þess vegna verður kostnaði vegna breytinganna haldið í lágmarki. Ásýnd útibúa mun taka breytingum á næstu vikum og endurnýjun á markaðsefni verður unnin á meðan eldri birgðir klárast. Eðlileg endurnýjun er því látin koma í veg fyrir óþarfa tilkostnað.

Fréttatilkynningu Arion banka má einnig nálgast hér.