Niðurfærsla lána heimila 196 milljarðar króna um áranmót

Lán heimila höfðu í lok árs 2011 verið færð niður um rúma 196 milljarða króna frá stofnun nýju bankanna. Til samanburðar nam niðurfærslan samtals tæpum 144 milljörðum króna í lok júlímánaðar og 172,6 milljörðum króna í lok september. Í októbermánuði nam niðurfærsla lána um 9,4 milljörðum króna, 11,5 milljörðum króna í nóvember og 2,9 milljörðum í desember, samkvæmt upplýsingum sem Samtök fjármálafyrirtækja (SFF) hafa aflað meðal aðildarfélaga sinna og hjá Íbúðalánasjóði. Tölur frá lífeyrissjóðum miðast við lok september. Niðurfærsla fasteignalána síðustu þrjá mánuði ársins nam um 12 milljörðum króna vegna 110% leiðarinnar,  um 11,6 milljörðum króna vegna endurútreiknings lána og tæplega 200 milljónir króna eru til komnar vegna sértækrar skuldaaðlögunar.

Til viðbótar þeirri niðurfærslu sem rakin er hér að ofan, hafa fjármálafyrirtæki boðið upp á önnur úrræði sem lækkað hafa eftirstöðvar skulda viðskiptavina þeirra.

Um 88.400 mál afgreidd í lok árs. Tæplega 1.700 mál enn í vinnslu

Um áramót var búið að afgreiða tæplega 15.589 umsóknir af þeim 16.475 sem bárust vegna 110% leiðarinnar. Innan við 900 umsóknir voru enn í vinnslu og má því ljóst vera að senn lýkur útreikningum samkvæmt þessu úrræði. Niðurfærsla samkvæmt 110% leiðinni nam 12 milljörðum króna á síðasta ársfjórðungi 2011 og nemur því samtals rúmum 43,6 milljörðum króna frá ársbyrjun 2009. Heildartalan vegna þessa úrræðis á enn eftir að hækka þó áhrifin af aðgerðum fjármálafyrirtækja í 110% leið séu að stærstum hluta komin fram. Rétt er að ítreka að tölur frá lífeyrissjóðum miðast við lok september.

Af 1.329 umsóknum um sértæka skuldaaðlögun var búið að afgreiða 903 mál um áramót. Samþykktar höfðu verið 824 umsóknir en 79 hafnað. 406  mál voru enn í vinnslu. Heildarniðurfærsla vegna þessa úrræðis nam í lok árs rúmum 6,2 milljörðum króna.

Fjármálafyrirtækin höfðu um áramót lokið endurútreikningi rúmlega 70 þúsund gengistryggðra lána. Þar af eru ríflega 13 þúsund fasteignalán og um 57 þúsund lán vegna bifreiðaviðskipta. Heildarniðurfærsla fasteignalána vegna endurútreiknings nam um áramót 108 milljörðum króna. Lán vegna bifreiðaviðskipta hafa verið færð niður um 38,5 milljarða króna við endurútreikning. Enn eru um 340 lán sem eftir er að ljúka endurútreikningi á. Þar af eru 280 vegna fasteigna.

33 milljarðar króna í frystingu hjá tvö þúsund heimilum

Í ársbyrjun 2011 voru um 4.700 heimili með samtals 7.600 lán í frystingu hjá fjármálafyrirtækjum. Í árslok var fjöldi lánanna kominn niður í rúmlega 3.000 og fjöldi heimila þar á bak við voru um tvö þúsund. Eftirstöðvar þessara lána námu um áramót  um 33 milljörðum króna.

Hafa ber í huga þegar þessar tölur eru skoðaðar að lántakar kunna í sumum tilvikum að hafa nýtt sér fleiri en eitt af þeim úrræðum sem staðið hafa til boða.

Sjá ennfremur meðfylgjandi töflu

Samandregin skýrsla um skuldaaðlögun heimila
Staða miðað við lok desember 2011

*) Gögn ekki tiltæk frá öllum