31 úrbótatillaga í átt að grænni framtíð
![](https://cdn.prod.website-files.com/65fc13cc50cee9777b2fd110/65fc13cc50cee9777b2fd4c0_Graenthing-min.jpeg)
Ellefu atvinnugreinar afhentu Guðlaugi Þór Þórðarsyni, umhverfis-, orku-, og loftslagsráðherra 332 tillögur að aðgerðum sem stuðla eiga að auknum samdrætti í losun atvinnugreina. Afhendingin fór fram á Grænþingi í Hörpu í gær, í tengslum við útgáfu Loftslagsvegvísa atvinnulífsins (LVA). LVA er samstarfsverkefni atvinnulífs og stjórnvalda og var vinnan unnin á forsendum fyrirtækja í íslensku atvinnulífi með stuðningi frá vinnuteymi umhverfis-, orku- og loftslagsráðuneytisins.
Samtök fjármálafyrirtækja ásamt aðildarfyrirtækjum okkar tóku þátt í vinnu við gerð Loftslagsvegvísis atvinnulífsins. Enda gegna fjármálafyrirtæki lykilhlutverki í loftslagsmálum út frá þeim óbeinu áhrifum sem starfsemi þeirra getur haft á atvinnulífið í tengslum við lánveitingar, fjárfestingar, vátryggingar og fleiri þætti.
Í loftslagsvegvísinum eru tilgreindar fjórar áskoranir sem fjármálafyrirtæki standa frammi sem stuðlað geta að því að markmið Íslands um 55% samdrátt í losun náist fyrir árið 2030. Áskoranirnar eru eftirfarandi:
- Samræma mat á fjármagnaðri losun og auka grænar lánveitingar og fjárfestingar
- Aukning forvarna gegn tjónum og hringrás tjónamuna
- Mat á áhættu tengdri loftslagsbreytingum
- Aukin fræðsla um loftslagsmál og græn fjármál
Alls er 31 úrbótatillaga nefnd sem fjármálafyrirtæki og stjórnvöld geta bæði hvort um sig og í sameiningu unnið að sem tengjast áskornunum fjórum.
Hægt er að kynna sér Loftslagsvegvísi atvinnulífsins og hlutverk fjármálafyrirtækja í vegvísinum hér.